اختفاء صورة البطل الأمريكى رامبو وظهور البطل الأسرائيلى زوهان

You don't miss with zohan
الفيلم من الأسم بس بيعيشك فى وهم البطل الأمريكى اللى بيتعامل مع الأخطار بكل سهولة
ويقتل الأعداء ومحدش يقدر يقوله تلت التلاته واحد
المره ده بقى الأمريكان حبوا يهادوا فيلم لحبايبهم فعملوا الفيلم ده
هو انا الأول كنت بحب ادم ساندلر لكن لما عرفت قصة الفيلم والقصة على فكرة لصالحنا اوى
لكن الفيلم نفسه لا
القصة بتاعه الفيلم ان زوهان سافر امريكا عشان يبعد عن مشاكل العرب واسرائيل ويشتغل مصفف شعر بيحب واحدة فلسطينية اسمها داليا ومش معرفها انه اسرائيلى وفى اخر الفيلم طبعا بيقولها وبتزعل وادم ساندلر بيقول ان العرب والأسرائيلين لازم ينسوا الخلافات وان فى عدو بيستفاد لما الأتنين بيحاربوا بعض والعدو ده لازم اللى نتصدالوا
انا مش هعلق على الكلام ده
بس الفيلم بقى نفسه بيبدا ان زوهان بيصيف وبيرقص مع البنات على الشط المخابرات(الموساد) بتبعت تجيبوا وتقولوا احنا هندمر ونقتل عشان نقبض على الأرهابى الوحش اللى مقالوش هو ارهابى ليه بس انت بتفهم انه ارهابى عشان عربى ضد اسرائيل هو يقولهم انتوا عارفين ان انتوا لما تقولوا هتدمروا وتقتلوا انا مش هرضى وهقوم بالمهمة ده لوحدى عشان محدش يموت (لانه اسرائيلى بيخاف على الأبرياء ) بيروح المنطقه العربيه ويدخل يضرب العرب ويفلت من الرصاص ويمسك الرصاصه قبل ماتوصله والعرب بيرتعشوا وخايفين وبعدين ينزل الشارع العرب الصغيرين يحدفوه بالحجارة ياخد الحجارة وبطيبة قلب كنت هعيط وانا بشوف اللقطة ده يعملهم لعبة عشان يلعبوا بيها وبعدين يزيف موته ويروح امريكا عشان يشتغل مصفف شعر فى واحد اسرائيلى هناك يعرفه يقوله روح الناصية اللى جمبنا فيها فلسطينية فاتحه محل تصفيف طبعا يقوله لا فلسطينية ازاى مينفعش المهم بيشتغل معاها ويحبها وفى الأخر يتجوزها. ازاى ؟ كدهو اقصد معرفش
المهم ويعيش العرب والأسرائيلين فى امريكا مع بعض الفيلم فيه حاجات سلبيه
1- زى لما العربى اللى فى امريكا قال فى نص الفيلم مين اللى هيكتب على المحلات بتاعتنا ارجعوا يا عرب لبيوتكم الأسرائيلى بكل بجاحة قاله 99 % من العالم .
2- الفيلم كان المفروض من القصه انه عايز يوضحلك انه محايد لكن باللى حصل كان بيوريك ان احنا سبب العداوات واحنا اللى بنكرههم من غير سبب ومش بس كده فى اللعبة اللى كان العرب والأسرائيلين بيلعبوها فى اخر الفيلم كان المفروض ( ده لو الفيلم محايد ) يجيبلك انها صفر صفر لكن بحركة ملهاش اى لازمة قبل ماالكاميرا ماتروح للمشهد اللى بعده المخرج اتعمد انه يجبلك انهم جابوا جون واكد على شاشه النتايج انهم 1 واحنا صفر وبعدين راح المشهد اللى بعده .
3-الأرهابى ومن غير سبب كان العربى ومطلعينه قاعد مع شوية بنات كتير لابسين خمار ونايم معاهم كلهم وحاجات تضايق .
4_كان الراجل الأسرائيلى لا يقهر وان العرب كانوا بيخافوا من خيالهم .
5-وبعدين اسم الفيلم نفسه لا تعبث مع (الأسرائيلين )
بس برضه كان فيه حاجات ايجابيه
1- ان الأسرائيلى سرق المعزه من العربى بعد ماضربه واعتذرله فى اخر الفيلم .
2- العربى اللى كان مربى دقنه فى اخر الفيلم صاحبه قاله بصراحه انت لو ركبت جمبى فى الطياره انا هترعب وانزل
هو انا مش عارف ده ايجابيه ولا سلبيه بس ماشى نقولوا انهم عشان ميعرفوناش قالوا كده
بجد والله العظيم دمى اتحرق بجد مش بهزر لدرجة انى مش طايق حتى نفسى لحد دلوقت انا لسه شايف الفيلم امبارح ومش عارف انا مخنوووووق بس قلت اكتب ده واتفرج على المسرحية الخطيرة اللى هيتريح اعصابى شوية (ماما امريكا )