رد على موضوع الجزار على رمضان فى موضوع فيلم Dark Knight

انا قلت اعمل الرد فى موضوع منفصل وده بيتهيالى افضل

انا شفت الفيلم مرتين والمره التانيه اكيد الانبهار مكنش زى الاولى المره التانيه تقدر تقول الواحد بيعد يحلل الفيلم كويس

ممكن ارد على بعض النقط اللى انتا قلتها

1-فكره انه فيلم كوميكس ده ميقللش منه بالعكس انا مبحبش النوعيه دى اصلا والفيلم قدر يغير فكرتى بالواقعيه اللى فيه ومش عشان هوا كوميكس يبقى الفيلم مينفعش تقارنه باافلام دراما مثلا بيتهيالى جوده اى فيلم وواقعيته هيا اللى تحكم وحكايه مقارنته ب جاد فازر دى بيتهيالى ظالمه شويه يعنى بما انك محب لجاد فازر زينا كلنا بيتهيالى انك متحامل شويه عالفيلم(على فكره انا عارف ان جاد فازر احسن مقلناش حاجه بس ده مش معناه انك تقلل من الفيلم ده لان فى ناس شايفاه احسن من جاد فازر)

2-انا شايف ان اداء هيث ليدجر عبقرى من احسن الشخصيات الشريره اللى شفتها فى حياتى الشرير اللى يخليك تحب شخصيته من متعه ادائه ليها زى هوبكنز فى صمت الحملان وخافيير بارديم فى نو كانترى مختلف معاك برضه

3-برضه شايف شخصيه ذو الوجهين شخصيه قويه فى الفيلم وشايف ان مساحتها قليله اه معاك بس خدت مبررات كفايه للتحول من الخير للشر وهيا صدمه موت ريتشل وانتصار الجوكر عليه واحساسه باليأس ان مفيش فايده وبالعكس المشهد اللى وقع فى عالارض عجبنى جدا فكرته وعجبنى تنفيذه تمثيليا واخراجيا
ممكن اكون متفق معاك فى حدوث تشتييت للمشاهد فعلا شويه بس لا تعتبر نقطه ضعف يعنى

4-اتفق معاك فى ان نظريه السونار من اكبر نقط ضعف الفيلم وخرجته شويه من اطار الواقعيه الجميل طول الفيلم بالرغم من دقه وحرفيه تنفيذها

5-ممكن انتا تكون شايف باتمان يبدأ الجزء الاول كان اقوى دراميا وده ممكن فعلا ولكنه ليس اقوى فى مشاهد الاكشن اكيد
بس الجزء الاول لازم يكون دراميا اقوى لانه بيحكى الموضوع بدأ ازاى وده محتاج مساحه دراميه اكبر انما الجزء التانى مفهوش الكلام ده ومينفعش ازوده دراميا وانسانيا لمجرد وجود دراما بيتهيالى الفيلم لا يحتمل ذلك
وجود رساله للفيلم وضح اوى فى مشهد العبارتين انه مش عامل فيلم اكشن وخلاص لا وعاوز يقول حاجه برضه ويدى معنى ولو بسيط للفيلم عشان يخليه فيلم شبه متكامل العناصر
ومشهد المطارده اللى فى النفق كان ممتع جدا ولس مملا كما ترى انت

6-انا اصلا غير مقتنع بكاتى هولمز فى الجزء الاول وارى انها احد نقط ضعف الجزء الاول
والممثله ماجى جيلنهال بيتهيالى عملت دور كويس وان كان دور محدود بس ادائها كان مقنع وحكايه مواصفاتها الشكليه اللى مش مبهره دى بيتهيالى مش مهمه المهم تعرف تعمل الدور كويس ولا لأ وشكلها مقبول يعنى مفيش مشكله

7-اتفق معاك فى النقطه دى بيتهيالى كريستيان بيل وان كان ادائه جيد جدا كالعاده بس الشخصيه ككتابه تحس انها ناقصه مش عارف يمكن يكون بسبب اداء هيث ليدجر العبقرى المشكله انك عاوز كريستيان يتألق على هيث ليدجر وده للأسف مينفعش فى الفيلم ده بالذات بالأداء ده بتاع هيث ليدجر بالشخصيه اللى مكتوبه دى بكل كلمه هوا بيقولها تحس فعلا انه دور عبقرى نادر انك تتفرج على تمثيل كده وده يقولك ان كريستيان بيل ليس بطل هذا الجزء بل البطل هوا هيث ليدجر بكل تأكيد ومش مطلوب ان كريستيان يعديه التركيز كان اكتر بيتهيالى على شخصيه الجوكر عكس الجزء الاول اللى كان تركيزه على شخصيه بات مان وبس

8-حكايه ان الفيلم اشبعك او لأ دى حاجه نسبيه جدا لاننا كل واحد فينا بيتأثر بكل فيلم بدرجه معينه وانا زى منتا اعدت تتكلم على مملكه الخواتم اسبوع انا برضه بتكلم عالفيلم ده بقالى اسبوع مش دليل على حاجه وحاله الذهول اللى بتيجى بعد بعض الافلام دى ساعات بتكون من نهايه صادمه للمشاهد او حاجه غير متوقعه جدا فى القصه تخلى المشاهد يحس ان المخرج غلب كل توقعاتك وضحك عليك بحرفيه وده مش موجود فى باتمان النهايه عاديه مفتوحه لجزء جديد

9- اى فيلم ليه اخطاء لان مفيش حاجه كامله واتفق معاك فى حكايه الشرطى دى
اما حكايه مشهد العربيه النقل المسروق هوا انا مش فاكر الفيلم التانى صراحه عشان اقارن بس لو كان زيه بالظبط يبقى لا تعليق على نولان مينفعش مخرج كبير زى نولان يعمل كده بس انا برضه اما ارجع اتفرج على اللقطه اللى انتا بتقول انه سرقها ارجع اتكلم فى النقطه دى

10-انا كان نفسى شخصيه الجوكر تبقى موجوده فى كل لقطات الفيلم اساسا وانتا بتقول انها عبقريه منه انه يخليك تتوقع ماضى الشخصيه وانا موافقك ان كده افضل
الماضى بتاعه اتحكى فى الحكايتين اللى هوا حكاهم عن كيفيه وجود الندوب اللى فى وشه بس انتا رجعت تقول ان فى حاجه ناقصه بس مقلتش ايه هيا ......التحضير السريع المباغت ده كان كويس بيتهيالى عشان رتم الفيلم السريع وانا مش فاهم يتحضرلها ازاى يعنى

11- اتفق معاك فى النقطه دى تماما مشهد الظهر بالبدلاء اللى كانوا موجودين مضافش حاجه خالص للفيلم ومكنش حلو

12- الموسيقى عجبتنى جدا طول الفيلم الموسيقى جيده وليست عبقريه جميله مناسبه لجو الفيلم العام وهيا فعلا مفهاش تيمه علقت بس الفيلم سريع اوى ومزيكته فى المعظم لمشاهد اكشن صعب تيمه تعلق معاك مش زى المزيكه الهاديه الخالده لجاد فازر فيلم بات مان ميحتملش مزيكه رايقه اوى كده

13-الحوار المباشر اللى فى اخر مش شايف فيه اى عيب الصراحه وميعيبش الفيلم فى اى حاجه مباشر اوى وايه يعنى

14-انا شايف ان المفروض مقارنوش بجاد فازر لان الفيلمين من نوعين مختلفين جدا كلاهما جيد جدا فى الصناعه والحرفيه فى كل عناصر الفيلم ويشتركان فى وجود عبقريات فى التمثيل وان كانت كفه جاد فازر ارجح اكيدفى التمثيل
ولو الناس مصره تقارن مين الاحسن ففيلم جاد فازر الافضل اكيد فى مقارنه مينفعش تحصل وده ميقللش من دارك ناينت انه من افضل الافلام اللى شفتها وبهرتنى فى كل حاجه

15- نقاط ضعف فى رأيى

-النهايه السريعه لشخصيه الجوكر واللى كان المفروض تبقى اكبر من كده

-المشهد بتاع الطوبه والبصمات انا مش فاهمه لغايه دلوقتى ياريت حد يفهمهولنا

-الحيله بتاعه التلفونات ده برضه اعتبره نقطه ضعف فى الفيلم

ومفيش فيلم مفهوش اخطاء بس دى اكتر نقط ضعف انا شايفها

__________________
I DON T Care: